• Hagnaður Arion banka á 4F 2022 var 5.023 m.kr., samanborið við 6.522 m.kr. á 4F 2021
• Arðsemi eiginfjár var 10,7%, samanborið við 13,4% á 4F 2021
• Hagnaður á hlut var 3,44 krónur, samanborið við 4,26 á 4F 2021
• Hreinn vaxtamunur var 3,1%, samanborið við 2,8% á 4F 2021
• Kjarnatekjur, þ.e. hreinar vaxta-, þóknana- og tryggingatekjur, jukust um 11,8% frá 4F 2021
• Kostnaður sem hlutfall af kjarnatekjum var 53,8% á 4F 2022, samanborið við 57,4% á 4F 2021
• Gjaldfærðir voru 1,6 milljarðar króna á fjórðungnum vegna kaupaukakerfis, byggt á árangursmælikvörðum í árslok, en þar á meðal er mælikvarðinn um hærri arðsemi en vegið meðaltal helstu keppinauta
• Efnahagsreikningur bankans stækkaði um 11,9% á árinu 2022
• Arðgreiðsla og endurkaup eigin bréfa námu 32,3 mö.kr. á árinu 2022
• Stjórn leggur til að greiddur verði arður að fjárhæð 8,5 krónur á hlut eða um 12,5 ma.kr. að teknu tilliti til eigin bréfa
• Eiginfjárhlutfall bankans var 24,0% og hlutfall almenns eiginfjárþáttar 1 var 18,8% þann 31. desember 2022, að teknu tilliti til fyrirsjáanlegrar lækkunar á eigin fé

Hagnaður Arion banka nam 5.023 m.kr. á fjórða ársfjórðungi og 25.416 m.kr. á árinu. Arðsemi eiginfjár var 10,7% á fjórða ársfjórðungi og 13,7% á árinu.

Heildareignir námu 1.470 mö.kr. í lok árs, samanborið við 1.314 ma.kr. í árslok 2021. Lán til viðskiptavina jukust um 15,9% á árinu. Aukningin nam 22,6% í lánum til fyrirtækja og 10,6% í lánum til einstaklinga, aðallega íbúðalánum. Aukning í innlánum frá viðskiptavinum var 15,2% og þar af var 15,5% aukning í kjarnainnlánum, þ.e. innlánum frá einstaklingum og fyrirtækjum. Heildar eigið fé nam 188 mö.kr. í árslok. Eigið fé lækkaði frá áramótum vegna arðgreiðslu og endurkaupa á hlutabréfum bankans, samtals að fjárhæð 32,3 ma.kr., en afkoma ársins kemur til hækkunar á eigin fé.

Eiginfjárhlutfall bankans (CAR hlutfall) var 24,0% í árslok og hlutfall almenns eiginfjárþáttar 1 var 18,8% að teknu tilliti til fyrirhugaðrar arðgreiðslu að fjárhæð 12,5 milljarðar króna og um 3,3 milljarða króna eftirstöðva gildandi endurkaupaáætlunar sem byggir á heimild Fjármálaeftirlits Seðlabanka Íslands. Eiginfjárhlutfall og hlutfall almenns eiginfjárþáttar 1 eru vel umfram kröfur sem settar eru fram í lögum og af Fjármálaeftirlitinu.

Benedikt Gíslason, bankastjóri Arion banka
„Starfsemi Arion banka gekk vel á árinu þrátt fyrir að aðstæður hafi um margt verið krefjandi. Efnahagsleg áhrif stríðsins í Úkraínu eru marþætt og finnast víða. Orkuverð hefur hækkað og verðbólga náð sjaldséðum hæðum í mörgum af okkar nágrannalöndum. Ísland er vissulega fjarri stríðsátökunum en við höfum ekki farið varhluta af þeirri óvissu sem þeim fylgir. Engu að síður var þróttur í íslensku efnahagslífi á árinu og útlit fyrir að hagvöxtur verði um 6-7%, meðal annars í krafti þess að við erum að miklu leyti sjálfbær í orkumálum með okkar grænu vatnsorku og jarðvarma. Arðsemi Arion banka á árinu 2022 var góð og yfir arðsemismarkmiði okkar. Vaxta- og þóknanatekjur og tekjur af tryggingastarfsemi, sem bankinn hefur skilgreint sem sínar kjarnatekjur, hækkuðu um 17,5%, en krefjandi markaðsaðstæður leiddu til þess að fjármagnstekjur bankans voru neikvæðar um þrjá milljarða. Staða bankans er áfram mjög sterk og eiginfjár- og lausafjárhlutföll vel yfir markmiðum bankans. Tillaga er gerð um 12,5 ma.kr. arðgreiðslu vegna rekstrarársins 2022 og bankinn heldur áfram með endurkaup á eigin bréfum, sem er í samræmi við arðgreiðslustefnu bankans.

Um mitt ár gekk salan á Valitor í gegn eftir nokkuð langt sölu- og samþykktarferli. Með sölunni má segja að fókus Arion samstæðunnar sé orðinn skýrari. Starfsfólk Varðar fluttist í höfuðstöðvar Arion banka í upphafi árs og vinnur starfsfólk Varðar, Stefnis og Arion banka þéttar saman en áður. Saman bjóða félögin þrjú fjölbreytta fjármálaþjónustu og er markmiðið með samstarfinu að geta boðið viðskiptavinum okkar heildstæða og aðgengilega þjónustu á sviði fjármála og trygginga. Styrkur samstæðunnar liggur einmitt í því hve fjölbreytt þjónustuframboðið okkar er.

Við leggjum okkur fram um að veita þjónustu sem mætir þörfum okkar viðskiptavina. Við lítum á það sem hlutverk okkar að hjálpa viðskiptavinum að ná markmiðum sínum með því að vera til staðar fyrir þá með þekkingu, lausnir og fjármagn. Í höfuðstöðvum bankans starfar samhentur hópur sérfræðinga sem veitir einstaklingum, fyrirtækjum og fjárfestum sérhæfða ráðgjöf sem og almenna fjármálaþjónustu. Við bjóðum einnig fjölbreytta og persónulega þjónustu og ráðgjöf á sviði trygginga, lífeyrismála, sparnaðar og íbúðalána í útibúum okkar um land allt. Arion appið er okkar vinsælasta þjónustuleið enda höfum við á undanförnum árum kynnt á fjórða tug stafrænna nýjunga sem einfalda fólki lífið þegar kemur að fjármálum. Það er ekki annað að sjá en að viðskiptavinir séu ánægðir með þessa þægilegu leið til að sinna fjármálunum. Við sjáum það ekki síst í notkun appsins, en viðskiptavinir okkar opna appið oftar en einu sinni á dag að meðaltali. Arion appið var á síðasta ári – sjötta árið í röð – valið besta bankaappið á Íslandi af viðskiptavinum bankanna samkvæmt könnun MMR. Samkvæmt erlendri samanburðarrannsókn þá er Arion banki í hópi með fremstu bönkum í heimi í stafrænni þjónustu.

Mikið var um að vera í íslensku efnahagslífi á árinu og kom bankinn að fjölmörgum spennandi verkefnum. Meðal annars að skráningum Alvotech, Nova og Amaroq Minerals í kauphallir. Bankinn var einnig með hæstu markaðshlutdeildina þegar kemur að veltu í kauphöllinni, bæði í skuldabréfum og hlutabréfum, og er þetta sjöunda árið í röð sem bankinn er með mestu hlutabréfaveltuna. Einnig var gott innflæði í eignastýringu bankans og í sjóði Stefnis og ávöxtun viðunandi í ljósi krefjandi markaðsaðstæðna.

Alþjóðlegir lánsfjármarkaðir fóru ekki varhluta af þeirri óvissu sem fylgir stríðsátökum í Evrópu. Arion banki er hins vegar í þeirri góðu stöðu að engin aðkallandi endurfjármögnun er fram undan á árinu 2023. Reyndar er það svo að mikilvægasti þátturinn í fjármögnun bankans eru innlán viðskiptavina sem, þrátt fyrir harðnandi samkeppni, jukust um 15% á árinu. Bankinn fór á árinu í tvær grænar skuldabréfaútgáfur sem eru nú alls orðnar fjórar frá því að græn fjármálaumgjörð bankans kom út. Til að styrkja stöðu okkar frekar á erlendum lánsfjármörkuðum fengum við lánshæfismat frá Moody‘s á árinu og er Arion banki nú með lánshæfismat frá bæði Moody‘s og S&P.“

Vefstreymi fyrir markaðsaðila 9. febrúar klukkan 8:30
Vefstreymi fyrir markaðsaðila verður fimmtudaginn 9. febrúar klukkan 8:30 í Borgartúni 19 þar sem Benedikt Gíslason bankastjóri Arion banka og Ólafur Hrafn Höskuldsson framkvæmdastjóri fjármálasviðs munu kynna afkomu bankans og Erna Björg Sverrisdóttir aðalhagfræðingur Arion banka mun fara yfir stöðu efnahagslífsins. Fundurinn fer fram á ensku.

Hægt verður að nálgast streymið beint á financialhearings.com og á fjárfestatengslavef bankans.

Þátttakendur geta spurt spurninga á meðan fundi stendur í gegnum spjallþráð sem birtist fyrir neðan vefstreymið. Spurningum verður svarað að loknum kynningum.

Vinsamlegast beinið fyrirspurnum til Theodórs Friðbertssonar, forstöðumanns fjárfestatengsla í síma 856 6760 eða Haraldar Guðna Eiðssonar, forstöðumanns samskiptasviðs í síma 856 7108.

Fjárhagsdagatal
Fjárhagsdagatal Arion banka er aðgengilegt á heimasíðu bankans.