Lykiltölur á 4F 2023

• Hagnaður Arion banka á 4F 2023 var 6.224 m.kr., samanborið við 4.965 m.kr. á 4F 2022
• Arðsemi eiginfjár var 12,7%, samanborið við 10,6% á 4F 2022
• Hagnaður á hlut var 4,28 krónur, samanborið við 3,37 á 4F 2022
• Hreinn vaxtamunur var 3,1%, óbreyttur frá 4F 2022
• Góður fjórðungur í þóknanastarfsemi og námu heildarþóknanir 3,9 mö.kr.
• Kjarnatekjur, þ.e. hreinar vaxta-, þóknana- og tryggingatekjur (án rekstrarkostnaðar tryggingastarfseminnar), jukust um 2% í samanburði við 4F 2022
• Kostnaður sem hlutfall af kjarnatekjum var 54,9% á 4F, samanborið við 53,7% á 4F 2022

Lykiltölur fyrir árið 2023

• Hagnaður Arion banka var 25.737 m.kr. á árinu, samanborið við 25.958 m.kr. á árinu 2022
• Arðsemi eiginfjár var 13,6%, samanborið við 14,1% 2022
• Hagnaður á hlut var 17,8 krónur, samanborið við 17,4 2022
• Hreinn vaxtamunur var 3,1%, óbreyttur frá árinu 2022
• Góður fjórðungur í þóknanastarfsemi og námu heildarþóknanir 16,4 mö.kr.
• Kjarnatekjur, þ.e. hreinar vaxta-, þóknana- og tryggingatekjur (án rekstrarkostnaðar tryggingastarfseminnar), jukust um 7% í samanburði árið 2022
• Kostnaður sem hlutfall af kjarnatekjum var 44,7% á árinu, samanborið við 45,0% á árinu 2022
• Efnahagsreikningur bankans hefur stækkað um 4,1% frá árslokum 2022
• Lán til viðskiptavina hafa aukist um 6,3% á árinu. Hækkun á lánum til fyrirtækja var 8,2% og 4,6% á lánum til einstaklinga, einkum íbúðalán
• Innlán frá viðskiptavinum jukust um 4,9% á árinu
• Eiginfjárhlutfall bankans var 24,1% og hlutfall almenns eiginfjárþáttar 1 var 19,7% í lok desember
• Stjórn bankans leggur til að um 13 milljarða króna arður verði greiddur, að teknu tilliti til eigin bréfa bankans, sem samsvarar 9,0 krónum á hlut

Benedikt Gíslason, bankastjóri Arion banka
„Afkoma Arion samstæðunnar á árinu 2023 var góð og í samræmi við markmið okkar. Þriðja árið í röð nást öll helstu fjárhagsmarkmið ársins. Þannig einkennist starfsemi okkar af stöðugleika sem meðal annars byggist á einstöku og fjölbreyttu þjónustuframboði. Í raun er það svo að ekkert fjármálafyrirtæki hér á landi býður viðskiptavinum sínum jafn fjölbreytta fjármálaþjónustu og Arion samstæðan. Bankinn er áfram fjárhagslega sterkur og eru eiginfjárhlutfall og hlutfall almenns eiginfjárþáttar 1 töluvert umfram þær kröfur sem Fjármálaeftirlit Seðlabanka Íslands gerir og ákvæði í lögum. Lausafjárstaða bankans var sömuleiðis mjög sterk í lok ársins og vel yfir lögbundnum lágmörkum. Stjórn Arion banka mun leggja fram þá tillögu á aðalfundi þann 13. mars að greiddur verði arður í samræmi við arðgreiðslustefnu bankans, eða 9 krónur á hlut.

Segja má að það sem helst hafi einkennt árið 2023 sé barátta við háa verðbólgu og jarðhræringar á Reykjanesskaga sem tefldu framtíð byggðar í Grindavík í tvísýnu. Sú erfiða staða er uppi að íbúar Grindavíkur vita ekki hvenær, eða hvort, hægt verður að flytjast aftur til bæjarins. Vegna óvissunnar ákváðum við ásamt öðrum fjármálafyrirtækjum í nóvembermánuði að frysta íbúðalán vegna húsnæðis í Grindavík í þrjá mánuði og fella niður vexti og verðbætur lánanna á tímabilinu. Snemma árs 2024 framlengdum við úrræðið í þrjá mánuði, eða til aprílloka. Þannig viljum við leggja okkar af mörkum til að styðja við bakið á íbúum Grindavíkur.

Á árinu kynntum við tvær nýjungar sem koma til móts við þá viðskiptavini okkar sem standa frammi fyrir hærri greiðslubyrgði í kjölfar þess að fastvaxtatímabili íbúðalána þeirra lýkur. Annars vegar bjóðum við upp á svokallað greiðslufrí í einn mánuð á ári og hins vegar svokallað greiðsluþak sem felst í því að við lækkum greidda vexti um allt að 4 prósentustig. Sú vaxtagreiðsla sem frestast færist á höfuðstól lánsins. Þessi lausn hentar þeim sem vilja lækka greiðslubyrði en vilja áfram óverðtryggt lán. Jafnframt höfum lagt okkur fram um að setja okkur í samband við þennan hóp og fara með fólki yfir þá kosti sem í boði eru.

Á árinu 2023 horfðum við sérstaklega til stöðu kynjanna þegar kemur að fjárfestingum og eignastöðu. Við lögðumst í mikla greiningarvinnu og eins og við var að búast er því miður enn langt í land áður en jafnræði ríkir á milli kynjanna þegar kemur að sparnaði, lífeyriseign og þátttöku á fjármálamarkaði. Því ýttum við úr vör langtíma átaksverkefni, Konur fjárfestum, með það fyrir augum að hvetja konur til að láta til sín taka á sviði fjárfestinga. Við höfum enn fremur sett okkur árangurstengd markmið til næstu ára. Átakið hefur farið vel af stað og húsfyllir verið á þeim fræðslufundum sem við höfum staðið fyrir.

Alþjóðlega lánshæfismatsfyrirtækið Moody's Investors Service veitti Arion banka í fyrsta sinn lánshæfiseinkunn á sértryggð skuldabréf. Arion banki fékk langtímaeinkunnina Aa2 sem útgefandi sértryggðra skuldabréfa í evrum. Arion var fyrstur íslenskra banka til að gefa út slík skuldabréf sem í dag eru mikilvægur hluti af fjármögnun íslenska fjármálakerfisins. Um er að ræða hæstu lánshæfiseinkunn íslensks útgefanda og er hún þremur þrepum yfir lánshæfiseinkunn íslenska ríkisins. Þetta er mikilvægur áfangi sem mun stækka hóp fjárfesta sértryggðra skuldabréfa bankans.

Brynjólfur Bjarnason, sem var fyrst kjörinn í stjórn Arion banka á hluthafafundi í nóvember 2014 og kjörinn formaður stjórnar í mars 2019, hefur ákveðið að gefa ekki kost á sér til áframhaldandi stjórnarsetu. Það eru því viss tímamót hjá okkur og vil ég fyrir hönd starfsfólks Arion þakka Brynjólfi fyrir afar ánægjulegt og árangursríkt samstarf. ”

Brynjólfur Bjarnason, fráfarandi stjórnarformaður Arion banka:
„Eftir að hafa setið í áratug í stjórn Arion banka og þar af gegnt stjórnarformennsku síðastliðin fimm ár, tel ég rétt að láta gott heita. Það hefur verið afar ánægjulegt að taka þátt í vegferð bankans sem hefur tekið miklum breytingum á þessum tíu árum.

Arion hefur til að mynda haft forystu um innleiðingu stafrænnar og þægilegrar fjármálaþjónustu hér á landi. Þá hefur bankinn aukið þjónustuframboð sitt verulega, það eru ekki mörg fjármálafyrirtæki í Evrópu sem bjóða viðskiptavinum sínum jafn fjölbreytta fjármálaþjónustu og Arion banki og dótturfélög hans eftir að tryggingar urðu hluti af þjónustunni. Rekstur bankans hefur gengið vel og efnahagur hans er traustur. Í ljósi þessara styrkleika er ég sannfærður um að Arion sé afar vel í stakk búinn að takast á við áskoranir framtíðarinnar. Ég þakka hluthöfum bankans fyrir traustið. Starfsfólki Arion, stjórn og viðskiptavinum þakka ég árangursríkt samstarf.“

Tilnefningarnefnd Arion banka, sem auglýsti eftir framboðum til stjórnar 4. janúar síðastliðinn, hefur lengt frest til að tilkynna nefndinni um framboð, kjósi frambjóðendur að fá umsögn tilnefningarnefndar, til 21. febrúar næstkomandi. Almennur framboðsfrestur er sem fyrr 5 dögum fyrir aðalfund, til 8. mars 2024 kl. 16.00.

Fundur fyrir markaðsaðila fimmtudaginn 8. febrúar kl. 8:30
Fjárfestafundur fyrir markaðsaðila verður fimmtudaginn 8. febrúar klukkan 8:30 í Borgartúni 19 þar sem Benedikt Gíslason, bankastjóri Arion banka, og Ólafur Hrafn Höskuldsson, framkvæmdastjóri fjármálasviðs, munu kynna afkomu bankans og fara yfir stöðu efnahagslífsins. Fundurinn fer fram á ensku og verður streymt beint.

Hægt verður að nálgast streymið á Lumiconnect og á fjárfestatengslavef bankans.

Þátttakendur sem fylgjast með rafrænt geta spurt spurninga á meðan á fundi stendur í gegnum spjallþráð á sömu síðu. Spurningum verður svarað að loknum kynningum.

Fjárhagsdagatal
Fjárhagsdagatal Arion banka er aðgengilegt á heimasíðu bankans.

Markaðsdagur Arion banka verður haldinn þann 1. mars og aðalfundur bankans 13. mars.