·       Heildartekjur á 4. ársfjórðungi jukust um 10% og námu 48 milljörðum króna (349 milljónum USD)
·       EBIT afkoma batnaði um 2,5 milljarða króna (18 milljónir USD), EBIT á 4. ársfjórðungi neikvætt um 4,4 milljarða króna (32 milljónir USD)
·       Einingatekjur á fjórðungnum jukust um 1,5%, aðallega vegna bættrar sætanýtingar
·       Einingakostnaður lækkaði um 3%, vegna hagræðingar í rekstri og lægri eldsneytiskostnaðar
·       Metfjöldi farþega á 4. ársfjórðungi, jákvæð þróun á markaðnum til Íslands
·       Heildarfjöldi farþega á árinu 4,7 milljónir, aukning um 9%
·       Tap ársins 2,5 milljarður króna samanborið við 1,5 milljarðs króna hagnað í fyrra
·       Áframhaldandi góð afkoma í leiguflugi og jákvæður viðsnúningur á fraktstarfsemi
·       Stundvísi batnaði töluvert, jókst um 5,6 prósentustig
·       Fyrsta Airbus vél í sögu félagsins afhent í desember
·       Sterkt sjóðsstreymi frá rekstri 30,5 milljarðar (221 milljónir USD) á árinu, jókst um 828 milljónir króna (6 milljónir USD)
·       Lausafjárstaða sterk í lok árs eða 48 milljarðar króna (347 milljónir USD)
·       EBIT afkoma árið 2025 áætluð 5,5-8 milljarðar króna (40-60 milljónir USD)
 
Bogi Nils Bogason, forstjóri
„Við náðum verulegum rekstrarbata á fjórða ársfjórðungi í öllum einingum. Þróun einingatekna er að snúast við og náðum við að draga úr áhrifum ýmissa kostnaðarhækkana með áherslu á umbætur í rekstri. Rekstrarniðurstaða ársins í heild var í  takt við afkomuspá sem við gáfum út í október síðastliðinn en við gerum ráð fyrir að sú jákvæða þróun sem við sáum í fjórða ársfjórðungi muni halda áfram á komandi mánuðum. Horfur fyrir árið 2025 eru góðar og bókunarstaðan nú er sterkari en á sama tíma í fyrra. Við áætlum að auka flugframboð um 8% á árinu, með áherslu á vöxt utan háannar sem gerir okkur kleift að nýta innviði betur og bjóða viðskiptavinum okkar upp á fleiri ferðamöguleika en nokkru sinni áður.

Á árinu 2024 náðum við góðum árangri í rekstri leiðakerfisins sem endurspeglaðist meðal annars í framúrskarandi stundvísi en félagið var útnefnt eitt af stundvísustu flugfélögum í Evrópu yfir sumarmánuðina. Við náðum jafnframt viðsnúningi í rekstri fraktstarfsemi okkar og leiguflugið hélt áfram að skila góðri afkomu.

Til þess að bæta árangur og afkomu félagsins til lengri tíma, hófum við yfirgripsmikla umbreytingarvegferð snemma á árinu 2024. Í lok ársins höfðum við þegar ráðist í hagræðingarverkefni sem munu skila yfir 20 milljónum dala á ársgrundvelli. Við gerum ráð fyrir að vegferðin muni skila samtals 70 milljónum dala á ársgrundvelli í lok árs 2025 í kjölfar frekari umbóta á þessu ári.

Það má segja að árið 2024 hafi markað nýtt upphaf fyrir Icelandair þegar við tókum á móti fyrstu Airbus flugvélinni í lok árs og fluttum í nýja Icelandair húsið í Hafnarfirði. Ég vil þakka okkar öfluga starfsfólki fyrir frábær störf á árinu, hluthöfum okkar fyrir stuðninginn og umfram allt viðskiptavinum okkar fyrir að velja Icelandair. Við höfum sett okkur metnaðarfull markmið um að bæta árangur félagsins á árinu 2025 og næstu ár. Ég er þess fullviss að skýrar áherslur okkar í rekstri munu styrkja stöðu félagsins enn frekar, bæta arðsemi og gera okkur kleift að nýta þau tækifæri sem blasa við bæði til skemmri og lengri tíma.“