Icelandair flutti 458 þúsund farþega í september, 10% fleiri en í september 2023. Þar af voru 31% á leið til Íslands, 16% frá Íslandi, 48% ferðuðust um Ísland og 5% innan Íslands. Sætanýting var 83% og stundvísi var 86,6%. Stundvísi jókst um 5,6 prósentustig á milli ára og er um að ræða metárangur í september frá árinu 2009. Það sem af er ári hefur Icelandair flutt 3,6 milljónir farþega, 8% fleiri en í fyrra. 

Bogi Nils Bogason, forstjóri Icelandair:  
„Það er ánægjulegt að sjá áframhaldandi fjölgun farþega og framúrskarandi stundvísi en undanfarna mánuði höfum við verið á meðal stundvísustu stærri flugfélaga í Evrópu. Við höfum undanfarið lagt mikla áherslu á að bæta skilvirkni í rekstrinum sem meðal annars hefur skilað sér í stórbættri stundvísi og þessum árangri höfum við náð með sameiginlegu átaki alls starfsfólks.  
Við höldum áfram að þróa leiðakerfið okkar með spennandi nýjum áfangastöðum og samstarfi við önnur flugfélög. Sumarið 2025 hefjum við flug til Nashville í Bandaríkjunum og síðar í þessum mánuði bætist Lissabon í Portúgal við leiðakerfið. Í september tilkynntum við um tilvonandi samstarf okkar við flugfélagið Southwest Airlines og verðum þar með þeirra fyrsta samstarfsflugfélag. Slíkir samstarfssamningar skipa mikilvægan sess í rekstri Icelandair en um það bil 10% af heildartekjum félagsins koma frá samstarfi við önnur flugfélög. Fyrir einstakar flugleiðir nema þessar tekjur allt að 40%. Við munum halda áfram að leggja áherslu á að fjölga samstarfsflugfélögum og bjóða þannig viðskiptavinum okkar enn meira úrval áfangastaða.“