• Met tekjur að fjárhæð 42,9 milljarðar króna (346,5 milljónir USD), aukning um 21%
• Bætt rekstrarafkoma; EBIT tap að fjárhæð 6,6 milljarðar króna (53,3 milljónir USD), bæting um 1,1 milljarð króna (8,9 milljónir USD) á milli ára
• Töluverð bæting á EBIT hlutfalli, neikvætt um 15,4% samanborið við 21,7% á síðasta ári
• Tap eftir skatta nam 5,6 milljörðum króna (45,3 milljónum USD) samanborið við 6,1 milljarð króna (44,1 milljón USD) á síðasta ári, en jákvæð gengisáhrif komu til lækkunar á tapi síðasta árs
• Hærri tekjur á hvern seldan sætiskílómetra og metsætanýting skiluðu 7% hækkun á einingatekjum
• Bætt skilvirkni skilaði óbreyttum einingakostnaði milli ára, þrátt fyrir umtalsverðar launahækkanir og óhagstæða gengisþróun
• Icelandair var meðal stundvísustu flugfélaga í Evrópu á fyrsta ársfjórðungi 2026, með 82,0% stundvísi (OTP)
• Sterk lausafjárstaða að fjárhæð 77,0 milljarðar króna (616,3 milljónir USD) í lok
  1. ársfjórðungs, aukning um 14,2 milljarða króna (106,8 milljónir USD) samanborið við
  1. ársfjórðung 2025

Bogi Nils Bogason, forstjóri

„Við náðum árangri á mörgum sviðum á fyrsta ársfjórðungi. Við skiluðum met tekjum sem endurspeglar áherslur okkar á markaðina til og frá Íslandi sem skila betri framlegð við núverandi markaðsaðstæður en tengiflug yfir hafið. Við jukum flugframboð um 13% sem er í takt við stefnu okkar að nýta innviðina okkar betur. Þrátt fyrir þessa aukningu náðum við met sætanýtingu í fjórðungnum og vorum jafnframt eitt stundvísasta flugfélag í Evrópu þó svo talsverðar raskanir hafi orðið á flugáætlun vegna veðurs á Íslandi í marsmánuði. Tekjur af fraktstarfsemi jukust einnig á milli ára og afkoma af leiguflugi var góð í fjórðungnum. Gengisáhrif og launahækkanir höfðu neikvæð áhrif á kostnaðarþróun en við héldum áfram að leggja áherslu á stundvísi og hagræðingu í rekstri.

Snörp hækkun olíuverðs að undanförnu hafði ekki teljandi áhrif á afkomuna í fjórðungnum en við munum sjá meiri áhrif þessara hækkana frá og með öðrum ársfjórðungi. Til að bregðast við þessari stöðu höfum við dregið flugframboð saman um rúmlega 2% frá miðjum apríl til loka júní. Þá eru hækkanir á farmiðaverði óhjákvæmilegar og fargjöld hafa verið hækkuð frá því að þessi þróun eldsneytisverðs hófst. Þetta hefur þó ekki haft mælanleg áhrif á eftirspurn eins og staðan er í dag.

Ýmsar ytri aðstæður hafa áhrif á flugrekstur og því er mikilvægt að tryggja fyrirsjáanleika til lengri tíma í sem flestum rekstrarþáttum, svo sem kjarasamningum sem eru nú lausir. Áherslurnar í samningaviðræðum við flugstéttirnar eru að félagið geti áfram boðið eftirsótt störf í flugrekstri á Íslandi með því að tryggja samkeppnishæfni félagsins, styðja við vöxt leiðakerfisins og flotans, ásamt því að auka rekstrarlegan sveigjanleika. Auk þess á félagið í samtali við íslensk stjórnvöld um mikilvægi þess að verja samkeppnishæfni Íslands þegar kemur að evrópsku regluverki, sérstaklega er varðar ETS kerfið og önnur loftslagsgjöld.

Fjárhagsstaða félagsins er sterk og lausafjárstaðan hækkaði um 107 milljónir USD miðað við sama tíma í fyrra sem gerir okkur vel í stakk búin til að takast á við þær áskoranir sem framundan eru, ásamt áframhaldandi áherslu á kostnaðaraðhald og hagræðingu í rekstri. Að lokum vil ég þakka starfsfólki fyrir seiglu og frábæra vinnu, sérstaklega í kringum krefjandi aðstæður vegna veðurs í marsmánuði þar sem allir lögðust á eitt til að leysa úr flókinni stöðu með öryggi og hagsmuni farþega að leiðarljósi.“

Vefútsending 29. apríl 2026
Kynning á uppgjöri 1. ársfjórðungs 2026 verður í beinu streymi á https://icelandairgroup.com. Streymið hefst kl. 8:30 miðvikudaginn 29. apríl 2026 þar sem Bogi Nils Bogason forstjóri og Ívar S. Kristinsson framkvæmdastjóri fjármála munu fara yfir uppgjörið og svara spurningum. Fundurinn verður á ensku. Kynningin verður aðgengileg að fundi loknum á heimasíðu félagsins og undir fyrirtækjafréttum á heimasíðu Nasdaq Nordic: http://www.nasdaqomxnordic.com/news/companynews

Frekari upplýsingar veita

Fjárfestar: Íris Hulda Þórisdóttir, yfirmaður fjárfestatengsla. Netfang: iris@icelandair.is

Fréttamiðlar: Ásdís Ýr Pétursdóttir, forstöðumaður samskipta. Netfang: asdis@icelandair.is

Fjárhagsdagatal

• 2. ársfjórðungur 2026 – 21. júlí 2026
• 3. ársfjórðungur 2026 – 22. október 2026
• 4. ársfjórðungur og árið 2026 – 4. febrúar 2027