Á dagskrá fundarins voru hefðbundin aðalfundarstörf þar sem Heiðar Guðjónsson, stjórnarformaður, kynnti skýrslu stjórnar og Jón Guðni Ómarsson, bankastjóri, fór yfir starfsemi og afkomu bankans á árinu 2025. Ársreikningur bankans var samþykktur sem og skýrsla um framkvæmd starfskjarastefnu. Tillaga um greiðslu arðs að fjárhæð 12,6 milljarða króna, sem jafngildir 7,28 krónur á hlut, var samþykkt. Ákvað fundurinn að KPMG ehf. verði kjörið endurskoðunarfélag Íslandsbanka.

Samþykkt var tillaga stjórnar um þóknun stjórnarmanna og nefndarmanna í undirnefndum stjórnar sem og þóknun nefndarmanna í tilnefningarnefnd bankans. Aðalfundur samþykkti einnig tillögur stjórnar um breytingar á starfskjarastefnu bankans.

Tillögur til breytinga á samþykktum bankans voru samþykktar. Þá samþykkti aðalfundur tillögu stjórnar um lækkun hlutafjár með ógildingu eigin hluta og samsvarandi breytingu á samþykktum félagsins. Jafnframt var samþykkt tillaga stjórnar um heimild stjórnar til að kaupa fyrir hönd bankans allt að 10% af hlutafé hans. Heimild þessi skal nýtt í þeim tilgangi að setja upp formlega endurkaupaáætlun eða til að gera hluthöfum almennt tilboð um kaup bankans á eigin bréfum, t.d. með útboðsfyrirkomulagi, enda sé jafnræðis hluthafa gætt við boð um þátttöku í slíkum viðskiptum. Aðalfundur samþykkti einnig framlagðar breytingar á starfsreglum tilnefningarnefndar.

Í samræmi við grein 4.3. í samþykktum Íslandsbanka fór kosning stjórnar fram sem margfeldiskosning. Í stjórn Íslandsbanka sitja því nú eftirfarandi sjö stjórnarmenn:

• Haukur Örn Birgisson
• Heiðar Guðjónsson
• Helga Hlín Hákonardóttir
• Margrét Pétursdóttir
• Stefán Pétursson
• Stefán Sigurðsson
• Valgerður Hrund Skúladóttir

Heiðar Guðjónsson var endurkjörinn formaður stjórnar.

Varamenn í stjórn Íslandsbanka eru:

• Herdís Gunnarsdóttir
• Magnús E. Björnsson

Sjálfkjörið var í tilnefningarnefnd bankans og stöðu varamanns. Í tilnefningarnefnd sitja því nú eftirfarandi tveir nefndarmenn:

• Anna Rut Þráinsdóttir
• Hilmar Garðar Hjaltason

Varamaður í tilnefningarnefnd bankans er Dröfn Guðmundsdóttir.

Í meðfylgjandi skjali er nánar greint frá niðurstöðum fundarins.