Allar tillögur stjórnar til aðalfundar voru samþykktar. Tillögurnar eru aðgengilegar á vefsíðu fundarins: marel.com/agm. Nánari upplýsingar um atkvæðagreiðslu á fundinum er að finna í viðhengi.

Stjórnarformaður félagsins, Arnar Þór Másson, ávarpaði fundinn fyrir hönd stjórnar og Árni Oddur Þórðarson, forstjóri, gaf skýrslu um fjárhagsárið 2022 og veitti innsýn í starfsemi félagsins.

Úr skýrslu stjórnarformanns Marel, Arnars Þórs Mássonar:
„Frá skráningu á hlutabréfamarkað árið 1992 hefur Marel þróast frá því að vera sprotafyrirtæki með 45 starfsmenn og 6 milljónir evra í árstekjur yfir í leiðandi alþjóðlegt fyrirtæki á sviði lausna, hugbúnaðar og þjónustu í matvælavinnslu með um 8.000 starfsmenn og 1,7 milljarð evra í tekjur.

Með sögu um stöðugan árlegan meðaltalsvöxt upp á 21% frá árinu 1992 erum við hjá Marel stolt af afrekum félagsins og horfum björtum augum til framtíðar.“

Úr skýrslu forstjóra Marel, Árna Odds Þórðarsonar:
„Sjálfbærni er kjarninn í starfsemi Marel. Framtíðarsýn Marel er heimur þar sem hágæða matvæli eru framleidd á sjálfbæran og hagkvæman hátt. Marel er vel í stakk búið til þess að takast á við tímabil verðbólgu og óstöðugs efnahagsástands líkt og við sjáum nú þar sem umskipti frá alþjóðavæðingu yfir í svæðisvæðingu hafa verið hröð. Við leggjum mikla áherslu á að þjónusta viðskiptavini okkar um heim allan með framúrskarandi lausnum sem halda virðiskeðju matvæla gangandi og skila sér jafnframt í 40% stöðugum tekjum (e. recurring revenues). Þörfin fyrir aukna sjálfvirkni í heiminum hefur aukist hratt að undanförnu vegna vaxandi skorts á vinnuafli en hækkandi vaxtastig og órói á alþjóðamörkuðum kann að valda tímabundnum sveiflum í pöntunum á stærri verkefnum.

Á árinu 2023 munu áherslur félagsins einkum felast í enn nánara samstarfi við viðskiptavini okkar samhliða aukinni skilvirkni og hraða á grundvelli innviðafjárfestinga. Markmið okkar um 14-16% EBIT í lok ársins helst óbreytt. Vert er að minna á að tekjur og pantanir geta sveiflast á milli ársfjórðunga. Við höldum áfram að fjárfesta í innviðum og sjálfvirknivæðingu til að styðja við metnaðarfull markmið okkar um að 50% af tekjum félagsins komi frá þjónustu og hugbúnaði árið 2026.“

Eftirfarandi aðilar voru endurkjörnir í stjórn Marel hf.:

• Ann Elizabeth Savage
• Arnar Þór Másson
• Ástvaldur Jóhannsson
• Lillie Li Valeur
• Ólafur Steinn Guðmundsson
• Svafa Grönfeldt
• Ton van der Laan

Stjórn hefur skipt með sér verkum og er Arnar Þór Másson áfram formaður og Ólafur Guðmundsson varaformaður.

Aðrar tillögur til fundarins

• Aðalfundurinn samþykkti arðgreiðslu að fjárhæð 1,56 evrusent á hlut fyrir rekstrarárið 2022. Fyrirhuguð heildararðgreiðsla nemur um 11,7 milljónum evra, sem samsvarar um 20% af hagnaði ársins og er í samræmi við arðgreiðslustefnu félagsins.
• Tillaga um starfskjarastefnu félagsins með tilteknum breytingum fyrir 2023 var samþykkt.
• Tillaga um stefnu félagsins um kaupauka í formi frammistöðutengdra hlutabréfa var samþykkt.
• Hluthafar samþykktu einnig tillögu um stjórnarlaun vegna ársins 2023 og þóknun til endurskoðenda fyrir liðið starfsár.
• Tillögur um að bæta við grein 4.3 og breyta greinum 4.5, 4.20 og 4.22 varðandi hluthafafundi í 4. kafla samþykkta félagsins voru samþykktar. Breytingarnar tengjast nýlegum breytingum sem gerðar hafa verið á lögum nr. 2/1995 um hlutafélög.
• Tillaga um endurnýjun á heimild í grein 15.2 í samþykktum félagsins var samþykkt. Greinin heimilar stjórn að hækka hlutafé um allt að 75 milljónir króna að nafnvirði með útgáfu nýrra hluta, m.a. til þess að nota í tengslum við fyrirtækjakaup félagsins eða stefnumarkandi fjárfestingar. Gildistími heimildarinnar er 18 mánuðir frá samþykkt hennar.
• Endurskoðunarskrifstofan KPMG ehf. var kosin endurskoðandi félagsins.
• Tillaga um að endurnýja heimild félagsins til að kaupa eigin hlutabréf var samþykkt. Heimildin gildir í 18 mánuði frá samþykki. Eldri heimildir þessa efnis falla jafnframt niður.

Myndbandsupptökur af ávörpum stjórnarformanns og forstjóra verða gerðar aðgengilegar á vefsíðu fundarins marel.com/agm.

Ársskýrsla 2022
Ársskýrsla Marel fyrir árið 2022 er komin út. Þar er leitast við að gefa lesendum innsýn í starfsemi Marel, stefnu og tækifæri til vaxtar. Þema ársskýrslunnar – Nýsköpun, framþróun og sjálfbærni – endurspeglast í störfum okkar þvert á félagið. Árlega fjárfestir félagið um 6% af tekjum í nýsköpun og vöruþróun sem styður við aukna hagkvæmni, öryggi og sjálfbærni í matvælavinnslu og stuðlar að hámarksafköstum viðskiptavina.

Ársskýrslan er aðgengileg á stafrænu formi, þar sem meðal annars er að finna margmiðlunarefni, gagnvirkar töflur og gröf, og einnig sem PDF skjal.

Hægt er að kynna sér ársskýrslu Marel 2022 á marel.com/ar.