PC útgáfa af leiknum mun gera Solid Clouds kleift að setja leikinn á Steam, langstærstu leikjaefnisveitu heims. Hundruðir milljóna tölvuleikjaspilara nota veituna til að ná sér í leiki. PC útgáfan af leiknum mun einnig styðja við vöxt samfélags spilara Starborne Frontiers sem heldur til á Discord spjallforritinu. Félagsleg virkni spilara Starborne Frontiers á Discord-rás leiksins stuðlar til dæmis að því að spilarar loða betur við leikinn. 

Í kjölfar útgáfu Starborne Frontiers fyrir snjalltæki um síðustu mánaðamót hóf Solid Clouds að auglýsa leikinn í meira mæli á búðum Apple (App store) og Android (Google Playstore). Sú markaðssetning hefur gengið vel en nýir notendur í snjalltækjaleikjum koma að langmestu leyti í gegnum beinar auglýsingar. Vel hefur gengið að fá nýja spilara til að kaupa hluti í leiknum.

Sá mælikvarði sem Solid Clouds horfir mest á varðandi velgengni Starborne Frontiers er í hversu miklum mæli og hversu hratt auglýsingakostnaður skilar sér í tekjum (e. Return On Ad Spend, ROAS). Félagið hefur náð einu meginmarkmiði sínu sem er að fá 30% af auglýsingakostnaði til baka í formi tekna á einni viku.

“Teymið er stolt að hafa náð þessu markmiði en mikil vinna var lögð í að ná athygli spilara í byrjun leiksins. Við sjáum til dæmis að helmingur þeirra sem kaupir hluti í leiknum gerir það á fyrstu 20 mínútunum. Við gerum ráð fyrir að miðað við núverandi þróunarstöðu leiksins muni auglýsingakostnaður skila sér til baka í tekjum á innan við ári. Teymið vinnur nú áfram að því að besta leik- og tekjukerfi leiksins svo að markmið okkar um að auglýsingakostnaður skili sér um tvöfalt til baka í tekjum á einu ári náist”, segir Stefán Gunnarsson, forstjóri Solid Clouds.  

Áhugasamir spilarar geta sótt um aðgang að PC útgáfunni á Discord rás Solid Clouds.