Sunnmørsposten som er del av Polaris Media Nordvestlandet, har inngått avtale
med eigarane av Sykkylven Media AS, utgjevar av lokalavisa Sykkylvsbladet, om
kjøp av 100% av aksjane i selskapet.
Sykkylvsbladet er lokalavis for Sykkylven med eit opplag på om lag 2.500. Planen
er å utvide tilbodet til Sykkylvsbladet sine lesarar og annonsørar, med nye
digitale lesar- og annonseprodukt.

- Vi tok til i Sykkylvsbladet i 1982, og når vi no har nådd pensjonsalderen,
fann vi det rett å overlate avisverksemda til ein annan aktør, seier redaktør og
dagleg leiar Frank Kjøde og marknadssjef Åge Eikrem, som likevel enno ei tid
held fram i sine stillingar.
- Etter ei totalvurdering har vi kome fram til at Sunnmørsposten er det rette
valet med tanke på å vidareutvikle Sykkylvsbladet sin posisjon. Sunnmørsposten
har vist at dei kan balansere rolla som mediehus for Nordvestlandet, kombinert
med  det å vere eigar av lokalaviser i den same regionen. Med dei nye eigarane
har vi ei felles målsetting om å vidareutvikle Sykkylvsbladet sin posisjon, og
vi ser med spesiell forventning fram til at lokalavisa skal gi nye, digitale
tilbod til både lesarar og annonsørar, seier Frank Kjøde.

Sykkylvsbladet vart skipa i 1946, og har i løpet av desse snart 75 åra hatt
ulike eigarar.

Kjøpet av Sykkylven Media AS og Sykkylvsbladet utvidar Sunnmørsposten si rolle
som eigar av lokale mediehus på Nordvestlandet. Frå før er Sunnmørsposten eigar
av Sunnmøringen, Møre-Nytt, Vestlandsnytt og Vikebladet Vestposten på Sunnmøre,
Fjordenes Tidende, Fjordabladet og Fjordingen i Nordfjord og Mediehuset Skjåk
Mediautvikling (utgjevar av Fjuken) i Ottadalen, som igjen er eigar av Vigga og
Dølen (50%) i Gudbrandsdalen. Sunnmørsposten er ein del av Polaris Media
Nordvestlandet som etter oppkjøpet består av 15 mediehus som har nesten 80.000
abonnentar. Polaris Media Nordvestlandet er eit underkonsern av Polaris Media
ASA, som er blant dei raskast veksande mediekonserna i Norden, med totalt 51
mediehus, 550.000 abonnentar og om lag 3,6 mrd. kr i omsetning.

Sykkylvsbladet har over mange tiår utvikla ein sterk posisjon i sitt
dekningsområde. Sykkylvsbladet sine lesarar og annonsørar vil no kunne sjå fram
til eit utvida tilbod med vektlegging av digitale innhaldsprodukt.
Sunnmørsposten vil vere ein pådrivar for at dette vert etablert raskt ved å
stille fagressursar og utviklingsmiljø til disposisjon. Både lesar- og
annonsemarknaden er i rask endring, der konkurransen også er skjerpa, og som ny
eigar vil vi bidra til å styrke posisjonen i den lokale marknaden ytterlegare,
seier adm. dir. i  Sunnmørsposten, Kjell Slinning.

Direktør for lokale mediehus i Sunnmørsposten, Lidvar Flydal, ønskjer
Sykkylvsbladet velkomen inn i eit etablert og godt samarbeid mellom
Sunnmørsposten og dei andre lokale mediehusa på Nordvestlandet. Dette nettverket
har utvikla eit tett og nært samarbeid over lang tid, både redaksjonelt og
marknadsmessig. Dette vil etter kvart også bidra til eit styrka og utvida tilbod
til lesarar og annonsørar i Sykkylven, seier han.


Kontaktpersonar:
Adm. dir. i Sunnmørsposten AS, Kjell Slinning, tlf 911 56 373
Redaktør og dagleg leiar i Sykkylvsbladet, Frank Kjøde, tlf 915 47 701
Direktør lokale mediehus i Sunnmørsposten, Lidvar Flydal, tlf 926 855 26
Adm. dir. i Polaris Media Nordvestlandet, Harald H. Rise, tlf 926 855 28