REYKJAVÍK (18. júní 2026) - Alvotech (NASDAQ: ALVO, ALVO SDB) tilkynnti í dag að lokið væri sölutryggðu hlutafjárútboði í Bandaríkjunum. Fjárfestar fengu afhenta þann 17. júní sl. 26.066.667 almenna hluti á verðinu 3,75 dollarar á hlut. Í þeirri tölu eru 3.400.000 hlutir sem fjárfestingarbankarnir sem sáu um útboðið fengu úthlutaða eftir að hafa nýtt sér kauprétt á viðbótarbréfum á sama gengi og í útboðinu. Heildarafrakstur af útboðinu í Bandaríkjunum, áður en tillit er tekið til afsláttar og þóknana, er um 98 milljónir dollara (um 12,2 milljarðar króna).

Samhliða útboðinu hefur Alvotech gert áskriftarsamninga við tiltekna fjárfesta sem teljast fagfjárfestar eða viðurkenndir gagnaðilar á Evrópska efnahagssvæðinu (EES), í skilningi greinar 1(4) í reglugerð Evrópuþingsins og ráðsins 2017/1129. Alvotech mun gefa út og úthluta þessum fjárfestum 17.826.666 almenna hluti á verðinu 3,75 dollarar á hlut, því sama og í útboðinu í Bandaríkjunum. Heildarverðmæti viðskiptanna í lokaða útboðinu, áður en tillit er tekið til afsláttar og þóknana, er 67 milljónir dollara (um 8,4 milljarðar króna). Gert er ráð fyrir að þessum viðskiptum ljúki um 25. júní nk.

Stjórn Alvotech hefur samþykkt að gefa út 43.893.333 ný almenn hlutabréf sem afhent verða fjárfestum í útboðinu í Bandaríkjunum og í útboðinu innan EES. Heildarfjöldi útgefinna hluta í Alvotech verður að því loknu 390.431.480.

Heildarafrakstur Alvotech úr þessum viðskiptum nemur um 165 milljónum dollara (um 20,6 milljörðum króna), að undanskildum afslætti vegna sölutryggingar, þóknana og útboðskostnaðar.

Alvotech hyggst nýta afrakstur af sölu hlutabréfanna til þess að fjármagna þróun nýrra hliðstæðna líftæknilyfja, í veltufé og til að standa straum af rekstrarkostnaði, þar á meðal til þess að vernda lyfjahugvit félagsins, almennra rekstrarútgjalda, fjárfestinga í fastafjármunum, kaupa á búnaði, í samstarfsverkefnum, forklínískum og klínískum rannsóknum, við vöruþróun, undirbúning markaðssetningar nýrra lyfja og til endurgreiðslu skulda eða endurfjármögnunar.

Sameiginlegir umsjónaraðilar útboðsins í Bandaríkjunum voru fjárfestingarbankarnir BofA Securities, Jefferies og Evercore ISI.

Grunnskráningarlýsing fyrir útboðið í Bandaríkjunum (á eyðublaði F-3) sem tók gildi 30. október 2023 og sérstakur viðauki við grunnskráninguna (á eyðublaði 424B5) sem gefinn var út 16. júní sl. eru aðgengilegir á vef félagsins og á EDGAR síðu Verðbréfaeftirlits Bandaríkjanna (SEC). Upplýsingar og fyrirvara er jafnframt að finna í enskri útgáfu tilkynningarinnar.

Alvotech, fjárfestatengsl og samskiptasvið
Benedikt Stefánsson, forstöðumaður
alvotech.ir@alvotech.com

Um Alvotech
Alvotech, stofnað af Róberti Wessman, er líftæknifyrirtæki sem einbeitir sér að þróun og framleiðslu líftæknihliðstæðulyfja fyrir sjúklinga um allan heim. Alvotech stefnir að því að verða leiðandi fyrirtæki á sviði líftæknihliðstæðulyfja. Til að tryggja hámarksgæði eru allir þættir í þróun og framleiðslu í höndum fyrirtækisins. Alvotech framleiðir og markaðssetur fimm líftæknilyfjahliðstæður, hliðstæðu við Humira (adalimumab), Stelara (ustekinumab), Eylea (aflibercept), Simponi (golimumab) og Prolia/Xgeva (denosumab). Þá vinnur félagið að þróun líftæknilyfjahliðstæða sem m.a. geta nýst sjúklingum með sjálfsofnæmis-, augn- og öndunarfærasjúkdóma, blóðsjúkdóma eða krabbamein. Alvotech hefur gert samninga um sölu, markaðssetningu og dreifingu við samstarfsaðila á öllum helstu mörkuðum, í Bandaríkjunum, Evrópu, Japan, Kína, öðrum hlutum Asíu, Rómönsku-Ameríku, Afríku og Mið-Austurlöndum.

Frekari upplýsingar er að finna á vefsíðu Alvotech, á fjárfestasíðu okkar og á almennri vefsíðu félagsins á ensku. Fylgjast má með starfsemi Alvotech á LinkedIn, Facebook, Instagram og YouTube.