Ásar hf. – Samkeppniseftirlitið heimilar kaup á Öryggismiðstöð Íslands og Opnum kerfum
Vísað er til fyrri tilkynninga Ása hf. um kaup félagsins á öllu hlutafé í Öryggismiðstöð Íslands hf. (ÖMÍ) og Opnum kerfum hf. (OK), síðast frá 4. október sl. um sáttaviðræður við Samkeppniseftirlitið.
Ásar hafa nú fengið samþykki Samkeppniseftirlitsins fyrir kaupunum á ÖMÍ og OK. Kaupin eru mikilvægur liður í vaxtarstefnu Ása og styrkja áframhaldandi uppbyggingu samstæðunnar. Að viðskiptunum loknum er áætlað að tekjur samstæðunnar verði allt að 50 milljarðar króna og EBITDA hátt í 10 milljarðar króna á ársgrundvelli þegar samlegðaráhrif eru að fullu komin fram.
Samþykki Samkeppniseftirlitsins er veitt á grundvelli sáttar sem Ásar og Samkeppniseftirlitið hafa undirritað og felur í sér skilyrði. Markmið þess er að efla og vernda virka samkeppni á mörkuðum og bregðast við mögulegri röskun á samkeppni.
Í skilyrðinu felst að óheimilt verður að gera sérstök kjör til heimila á vaktaðri öryggisþjónustu háð því að viðkomandi heimili sé jafnframt í viðskiptum við félögin um talsímaþjónustu eða internetþjónustu um fastlínu. Félögunum verður þó ávallt heimilt að mæta samkeppni frá samkeppnisaðilum sem bjóða slík kjör.
Skilyrðið fellur niður að fimm árum liðnum en getur fallið niður fyrr ef hlutfall internettenginga Símans ehf. fer niður fyrir skilgreind viðmið.
Enn fremur lýsa Ásar því yfir að ekki séu til staðar áform um að breyta því fyrirkomulagi að félögin séu rekin sem dótturfélög, í samræmi við yfirlýsta stefnu samstæðunnar, án þess að skilyrði þess efnis sé sett. Þá er því lýst yfir að markmið kaupanna sé ekki að bjóða umfangsmiklar heildarlausnir þannig að útilokandi áhrif myndist á fyrirtækjamarkaði, og að félögin hafi við undirritun sáttarinnar engin áform um að bjóða blandaða vöndlun með vaktaðri öryggisþjónustu innifalinni sem sé til þess fallin að hafa útilokunaráhrif í för með sér á fyrirtækjamarkaði.
Gert er ráð fyrir að framkvæmd viðskiptanna eigi sér stað á næstu vikum í samræmi við kaupsamninga aðila. Samanlagt heildarvirði (e. enterprise value) OK og ÖMÍ í viðskiptunum nemur 13.750 milljónum króna að viðbættum leiguskuldbindingum sem eru áætlaðar um 1.000 milljónir króna. Endanlegt kaupverð til greiðslu ræðst þó meðal annars af stöðu nettó vaxtaberandi skulda og veltufjármuna á viðmiðunardegi uppgjörs. Kaupin verða fjármögnuð með hlutafé í Ásum, lánsfé og handbæru fé. Miðað er við að um 6.025 milljónir króna verði greiddar með afhendingu á u.þ.b. 390 milljónum hluta. Endanlegur fjöldi hluta mun þó ráðast af kaupverði eftir leiðréttingu vegna veltufjármuna og skulda.
Ásar hf. munu upplýsa um það þegar viðskiptin hafa verið frágengin.
Þessi tilkynning er birt af Ásum hf. og inniheldur upplýsingar sem töldust innherjaupplýsingar í skilningi 7. gr. reglugerðar Evrópuþingsins og Ráðsins (ESB) nr. 596/2014 um markaðssvik (MAR), sbr. lög nr. 60/2021, um aðgerðir gegn markaðssvikum, varðandi sáttarviðræður við Samkeppniseftirlitið sem lýst er að ofan. Tilkynning þessi er gerð af Maríu Björk Einarsdóttur, forstjóra Ása hf., í samræmi við upplýsingaskyldu félagsins samkvæmt MAR og 2. gr. framkvæmdarreglugerð framkvæmdastjórnarinnar (EU) 2016/1055.