Starfsemin á 2F2024

Afli bolfiskskipa félagsins var á tímabilinu 12.100 tonn en var 10.500 tonn á sama tímabili árið áður. Aukning var í veiðum á ýsu og gulllaxi samanborið við árið á undan, ufsaveiði var dræm líkt og á fyrra ári og ekki var úthlutað heimildum í djúpkarfa en árið 2023 veiddu skip félagins tæplega 1.000 tonn af djúpkafa á öðrum ársfjórðungi. Botnfiskafli til landvinnslu var um 6.200 tonn líkt og á sama tímabili á fyrra ári.

Verð á ferskum landunnum bolfiskafurðum var gott og sambærilegt við árið á undan. Verð á sjófrystum afurðum var nokkru lægra samanborið við sama tímabil seinasta ár.
Breytingar urðu á skipastól félagsins í júní þegar nýtt frystiskip kom inn í rekstur félagsins og hélt Þerney RE-1 í sína fyrstu veiðiferð fyrir Brim hf þann 21. júní sl. Í ágúst var svo lokið við sölu á frystiskipinu Örfirisey RE-4.

Rekstur uppsjávarsviðs markaðist af því að engin loðnuvertíð var á fyrsta ársfjórðungi. Kolmunnaveiði hófust að nýju í byrjun apríl og var seinasta löndunin 7. maí, veiðar gengu vel og var aflinn um 30 þúsund tonn, sem unninn var í verksmiðjum félagsins á Vopnafirði og Akranesi. Í lok júní héldu uppsjávarskipin til makrílveiða og komu fyrstu farmarnir á land í byrjun júlí.

Helstu atriði úr fjárhagsuppgjöri 2F 2024

• Vörusala var 79,7 m€ á fjórðungnum samanborið við 108,8 m€ á öðrum fjórðungi 2023
• Hagnaður var 1,0 m€ á fjórðungnum samanborið við 10,4 m€ á öðrum fjórðungi 2023
• EBITDA var 9,0 m€ og EBITDA hlutfall 11,3%
• Eignir hafa hækkað um 26 m€ frá áramótum og voru 975,7 m€ í lok tímabilsins
• Eigið fé þann 30. júní 2024 var 451,0 m€ og eignfjárhlutfall 46,2%

Guðmundur Kristjánsson, forstjóri:

„Uppgjörið núna er dæmigert fyrir uppgjör á loðnuleysisári. Engin loðna veiddist á árinu og það tekur í hjá okkur því hún vegur þungt í okkar rekstri. Við veiddum meira af botnfiski á  öðrum hluta þessa árs en á sama tíma í fyrra og tekjur af sölu hans jukust dálítið. Á móti komu verulegar kostnaðarhækkanir, bæði á aðföngum, launum, veiðigjöldum og kostnaði vegna brennslu á olíu í staðinn fyrir notkun á rafmagni. Og til viðbótar voru veiðiheimildar í mikilvægum fisktegundum fyrir okkur í Brimi skornar niður. Þegar allt þetta kemur saman er afkoman á fyrri hluta ársins ekki góð. Við sem höfum starfað í sjávarútvegir í áratugi vitum að það skiptast á skin og skúrir en rekstur og efnahagsreikningur Brims er traustur og það verður að haga seglum eftir vindi.“

Rekstur

Seldar vörur námu á 1H 2024 174 m€ samanborið við 222 m€ árið áður. Lækkun vörusölu má rekja til þess að engin loðnuvertíð var á árinu 2024.

Rekstrarhagnaður fyrir afskriftir (EBITDA) var 21,0 m€ eða 12,1% af rekstrartekjum, en var 45,3 m€ eða 20,4% árið áður.

Fjármagnsgjöld umfram fjáreignatekjur námu 8,4 m€ á fyrri árshelmingi 2024 en voru 6,3 m€ á sama tímabili í fyrra.

Hagnaður fyrir tekjuskatt á fyrri árshelmingi nam 6,4 m€, samanborið við 35,6 m€ á fyrri árshelmingi 2023. Tekjuskattur fyrir sama tímabil nam 0,9 m€, en var 6,3 m€ árið áður. Hagnaður tímabilsins varð því 5,5 m€ en var 29,3 m€ árið áður.

Efnahagur
Heildareignir félagsins námu 976 m€ í lok 2F 2024. Þar af voru fastafjármunir 830 m€ og veltufjármunir 145 m€. Hækkun á fastafjármunum skýrist vegna kaupa á frystitogaranum Þerney RE-1. Kaupin voru fjármögnuð með láni til eins árs. Fjárhagsstaða félagins er áfram sterk og nam eigið fé 451 m€ og var eiginfjárhlutfall 46,2%, en var 49,8% í lok árs 2023. Heildarskuldir félagsins voru 525 m€ í lok fjórðungsins og hækkuðu um 48 m€ frá áramótum.

Sjóðstreymi

Handbært fé frá rekstri nam 24 m€ á fyrri helmingi ársins, en var 16 m€ á fyrri helmingi ársins 2023. Fjárfestingar-hreyfingar voru neikvæðar um 55 m€ og fjármögnunarhreyfingar voru jákvæðar um tæpar 24 m€. Handbært fé lækkaði því um 8 m€ og var rúmar 26 m€ í lok tímabilsins.

Meginniðurstöður færðar til íslenskra króna

Séu niðurstöður rekstrarreiknings reiknaðar til íslenskra króna á meðalgengi fyrra árshelmings árins 2024 (1 evra = 149,47 ísk) voru tekjur 26,0 ma. króna, EBITDA 3,1 ma. og hagnaður 0,8 ma. Séu niðurstöður efnahagsreiknings reiknaðar til íslenskra króna á gengi 30. júní 2024 (1 evra = 148,9 ísk) voru eignir samtals 145 milljarðar króna, skuldir 78 milljarðar og eigið fé 67 milljarðar.

Hluthafar
Lokaverð hlutabréfa 30. júní 2024 var 70,6 kr. á hlut og var markaðsvirði félagsins þá 136 milljarðar króna. Fjöldi hluthafa var 1.774.

Samþykkt árshlutareiknings

Árshlutareikningurinn var samþykktur á stjórnarfundi Brims hf. 29. ágúst 2024. Árshlutareikningurinn er í samræmi við alþjóðlega reikningsskilastaðla (IFRS – International Financial Reporting Standards).

Kynningarfundur þann 29. ágúst 2024

Kynningarfundur fyrir markaðsaðila og fjárfesta verður haldinn fimmtudaginn 29. ágúst klukkan 16:30 í höfuðstöðvum félagsins að Norðurgarði 1. Guðmundur Kristjánsson forstjóri félagsins kynnir uppgjör fjórðungsins og svarar spurningum. Fundinum verður jafnframt streymt og hægt verður að fylgjast með honum á www.brim.is/streymi. Velkomið er að senda spurningar fyrir fundinn eða á meðan fundi stendur á netfangið fjarfestatengsl@brim.is. Aðsendum spurningum verður svarað í lok fundar.

Brim hf.

Brim er öflugt sjávarútvegsfyrirtæki sem starfar í sátt við samfélagið og umhverfið. Við stuðlum að verðmætasköpun í sjávarútvegi með vöruþróun, tæknilausnum og öflugu starfsfólki. Við tryggjum með ábyrgum veiðum og vinnslu, þar sem áhersla er á sjálfbærni og nýsköpun, að sjávarútvegur verði áfram burðarstólpi í íslensku samfélagi. Við leitum allra leiða til að lágmarka áhrif starfseminnar á umhverfið hvort sem er á sjó eða í landi.

Fjárhagsdagatal

Þriðji ársfjórðungur                 21. nóvember 2024
Fjórði ársfjórðungur                27. febrúar 2025

Nánari upplýsingar

Nánari upplýsingar veitir Guðmundur Kristjánsson forstjóri, sími 550-1000.