Eik fasteignafélag hf. tilkynnti þann 20. desember sl. um að félaginu hafi borist óskuldbindandi tilboð í Glerártorg á Akureyri.

Hefur það ferli sem fór af stað í framhaldinu ekki skilað ásættanlegum árangri fyrir Eik fasteignafélag og telst ferlinu þar með lokið.

Glerártorg, sem er stærsta verslunarmiðstöð landsbyggðarinnar, hefur gengið í gegnum miklar endurbætur á undanförnum tveimur árum sem hefur skilað sér í sterkri eftirspurn eftir leigurýmum og virðisútleiguhlutfalli í 97,5% um síðustu áramót. Áfram verður haldið í að gera torgið að höfuðstað verslunar- og þjónustu á Norðurlandi með frekari uppbyggingu ásamt fyrirhugaðri íbúðarbyggð á lóðum félagsins á Gleráreyrum sem styðja við svæðið. Þessu til viðbótar stendur til að reist verði samgöngumiðstöð við hlið Glerártorgs með tilheyrandi auknu flæði og aðgengi og því eru spennandi tímar framundan.