Eftir lokun markaða miðvikudaginn 20. desember 2023 barst Festi andmælaskjal frá SE vegna ætlaðra brota á skilyrðum sem fram koma í ákvörðun þess nr. 8/2019 (samruni N1 hf. og Festi hf.). Er andmælaskjalið liður í málsmeðferð rannsóknar sem hófst með tilkynningu SE til Festi í desember 2020.  Félagið svaraði formlega fyrirspurnum SE í febrúar 2021, eins og gert var grein fyrir í ársreikningum félagsins vegna áranna 2020, 2021 og 2022. 

Í andmælaskjalinu er gerð grein fyrir því frummati að Festi hafi í nokkrum liðum brotið gegn ákvæðum sáttar félagsins við SE sem gerð var 30. júlí 2018 vegna samruna N1 og Festi, jafnframt því sem vísað er til ætlaðra brota gegn 19. gr., sbr. 17. gr. samkeppnislaga.  Frummat SE er að meint brot Festi séu alvarleg og að til álita komi að beita viðurlögum á grundvelli 37. gr., 3. mgr. 17. gr. e. og 1. og 2. mgr. 16. gr. samkeppnislaga. 

Andmælaskjal SE felur hvorki í sér stjórnvaldsákvörðun né er það á nokkurn hátt bindandi. Svo sem greinir í andmælaskjalinu er það ritað í þeim tilgangi að auðvelda Festi að nýta andmælarétt sinn samkvæmt stjórnsýslulögum og stuðla að því að rétt ákvörðun verði tekin í málinu. Þá er því lýst að ef athugasemdir, skýringar eða ný gögn þykja gefa tilefni til, geti frummat SE tekið breytingum. 

Festi er enn þeirrar skoðunar að félagið hafi ekki brotið gegn ákvæðum sáttarinnar við SE og er vinna hafin við að bregðast við tilgreindu andmælaskjali og því frummati sem þar er lýst.