Breyting á fyrirkomulagi birtingar ársuppgjörs 2024/25

Fyrirhuguð birting á ársuppgjöri Haga 2024/25 og uppgjöri 4. ársfjórðungs verður með breyttu sniði frá áður birtu fjárhagsdagatali. Þann 15. apríl nk. verður óendurskoðað stjórnendauppgjör samstæðunnar birt en birtingu endurskoðaðs ársreiknings, ásamt ófjárhagslegum upplýsingum, verður frestað til 30. apríl nk. Fjárfestakynning verður haldin í kjölfar birtingar stjórnendaupplýsinga, þann 16. apríl nk. 

Ástæður þessarar breytingar eru einkum tvíþættar. Samruni Haga og samstæðu SMS í Færeyjum og áhrif þess á reikningsskil samstæðunnar eru umfangsmikil. Þá hefur einnig verið tekin ákvörðun um að breyta reikningsskilaaðferð vegna fjárfestingarfasteigna Haga, sem verða í ársuppgjörinu nú í fyrsta sinn færðar á gangvirði í stað afskrifaðs kostnaðarverðs. Af þessum sökum hefur vinna við endurskoðun og ársreikningsgerð verið umfangsmeiri og tímafrekari en gert var ráð fyrir.

Rafrænn kynningarfundur miðvikudaginn 16. apríl 2025

Rafrænn kynningarfundur fyrir markaðsaðila og hluthafa verður haldinn miðvikudaginn 16. apríl kl. 08:30. Þar munu Finnur Oddsson, forstjóri, og Guðrún Eva Gunnarsdóttir, framkvæmdastjóri fjármálasviðs, kynna rekstur og afkomu félagsins, ásamt því að svara fyrirspurnum.

Tekið verður við spurningum sem tengjast uppgjörinu á meðan útsendingu stendur á netfangið fjarfestakynning@hagar.is og verður þeim svarað eins og kostur er í lok fundar.

Fundinum verður streymt og er skráning á streymið hér: https://www.hagar.is/skraning.

Kynningargögn verða aðgengileg á heimasíðu Haga, www.hagar.is, við upphaf fundar.