Kaup Heima hf. („Heimar“ eða „félagið“) á öllu hlutafé Grósku ehf. („Gróska“) og Gróðurhússins ehf. („Gróðurhúsið“) („viðskiptin“), sem tilkynnt var um 23. apríl sl., eru nú frágengin.  

Gróska á fasteignina Grósku að Bjargargötu 1, 102 Reykjavík, samfélag nýsköpunar og eina stærstu og metnaðarfyllstu skrifstofubyggingu landsins. Fasteignin er um 18.600 m² að stærð ásamt 6.200 m² bílakjallara með 205 stæðum, eða samtals um 24.800 m². Gróðurhúsið rekur sprotasetur og vinnurými í fasteigninni. Eignin er BREEAM vottuð en við kaupin hækkar hlutfall vottaðra eigna Heima úr 38,9% í 41,1%

Meðal leigutaka í Grósku eru leikjaframleiðandinn CCP, bandaríska hugbúnaðarfyrirtækið NetApp, Vísindagarðar Háskóla Íslands, World Class, Íslandsstofa og fjölmörg önnur fyrirtæki sem eru í fararbroddi íslenskrar nýsköpunar. Samsetning leigutaka stuðlar að fjölbreyttu mannlífi í húsinu sem rímar vel við einkennisorð Heima um að „lifa, leika, starfa“. 

Kaupverðið var greitt, eins og áður hefur verið tilkynnt um, með útgáfu og afhendingu 258 milljón nýrra hluta í Heimum. Hlutirnir hafa verið teknir til viðskipta hjá Nasdaq og afhentir seljendum Grósku og Gróðurhússins.  

Sem liður í viðskiptunum mun fjárfestingarfélagið Omega ehf. kaupa hlut Björgólfs Thors Björgólfssonar og verður eftir kaupin stærsti hluthafi Heima með liðlega 12,5% hlut.  

Halldór Benjamín Þorbergsson, forstjóri Heima:
 

„Gróska er einstök bygging sem státar af öflugu samfélagi nýsköpunar og skapandi greina og sómir sér afar vel í okkar eignasafni. Staðsetningin á Háskólasvæðinu, stærð og hönnun hússins, auk nálægðar við miðborgina, mun að okkar mati styðja við stöðuga eftirspurn leigutaka eftir skrifstofum og öðru atvinnuhúsnæði í Grósku til langrar framtíðar. Við höfum á undanförnum misserum selt stakar eignir úr eignasafni Heima í samræmi við stefnu okkar um að eiga og reka sterka kjarna með fjölbreytta þjónustu í grennd við íbúðabyggð og góðar samgöngutengingar. Kaupin á Grósku og Gróðurhúsinu eru mikilvægt skref á þeirri vegferð og styrkja bæði félagið og eignasafn okkar.“ 

Birgir Már Ragnarsson, stjórnarformaður Grósku og meðeigandi Omega: 

„Salan á Grósku til Heima er ánægjuleg og markar tímamót í nærri tíu ára langri sögu uppbyggingar hugmyndaseturs í Vatnsmýrinni. Sú saga hófst þegar við sem stærstu eigendur CCP og í samstarfi við forstjóra félagsins, vildum byggja höfuðstöðvar sem hæfðu starfsemi þess. Í samstarfi við CCP og Reykjavíkurborg völdum við þessa staðsetningu, ekki síst vegna tenginga við vísindasamfélagið og háskólann.  Eftir að hafa unnið víða um heim og fjárfest í nýsköpun um langt skeið vaknaði sú hugmynd snemma að byggja upp þekkingarklasa sem myndi jafnast á við það besta sem þekkist á „campus-um“ tæknifyrirtækja erlendis.  Það hefur svo sannarlega tekist. Fyrir okkur sem komum að uppbyggingu hússins fylgir því líka mikil ánægja og stolt hversu mörg fyrirtæki sem náð hafa stórkostlegum árangri hafa stigið sín fyrstu skref í Grósku.  Þetta sýnir að ætlunarverkið tókst, að húsið yrði gróðrarstöð skapandi iðnaðar og verðmætasköpunar á grundvelli hugvits á íslandi. Svona metnaðarfullt hús verðskuldar öflugan eiganda sem hefur burði til að halda þróuninni áfram. Heimar eru öflugasta fasteignafélag landsins með flotta framtíðarsýn og í mínum huga rétti aðilinn til að taka við rekstri Grósku. Framtíðin er björt”  

LEX var ráðgjafi Heima í viðskiptunum og LOGOS ráðgjafi hluthafa Grósku og Gróðurhússins.  

Nánari upplýsingar veitir Halldór Benjamín Þorbergsson, forstjóri Heima, s. 821 0001.