• Góð loðnuvertíð eftir tvö léleg ár.
• Mikið framleitt af loðnuafurðum.
• Sala loðnuafurða fór rólega af stað.
• Frystitogarinn Blængur fiskaði vel á fjórðungnum.
• Landvinnsla í Grindavík gengið vel.
• Bolfiskskipin fiskuðu vel á fjórðungnum.
• Bolfiskmarkaðir almennt sterkir.
• Polar Pelagic með góðan ársfjórðung.
• Áskoranir í rekstri hlutdeildarfélagsins Arctic Fish.
  
  

Helstu niðurstöður úr fjárhagsuppgjöri tímabilsins 

• Hagnaður tímabilsins nam 35,1 m EUR.
• Rekstrartekjur tímabilsins námu 113,6 m EUR.
• EBITDA var 46,1 m EUR eða 40,5% á tímabilinu.
• Heildareignir samstæðunnar í lok tímabilsins námu 966,6 m EUR og eiginfjárhlutfall var 66,3%.

Rekstur 

Tekjur á fyrsta ársfjórðungi námu 113,6 m EUR samanborið við 78,6 m EUR á sama tímabili í fyrra. Rekstrartekjur jukust um 35,0 m EUR á milli tímabila eða um 44,6%.

Rekstrarhagnaður fyrir afskriftir (EBITDA) á tímabilinu var 46,1 m EUR eða 40,5% af rekstrartekjum, en var 21,1 m EUR og 26,8% af rekstrartekjum á sama tímabili 2025. Aukning á milli tímabila nemur því 25,0 m EUR.

Hagnaður fyrir tekjuskatt var 43,4 m EUR samanborið við 9,9 m EUR á fyrsta fjórðungi 2025. Tekjuskattur var 8,4 m EUR og hagnaður fyrsta ársfjórðungs 2026 nam því 35,1 m EUR samanborið við 6,9 m EUR hagnað fyrsta ársfjórðung 2025. 

Efnahagur 

Heildareignir námu 966,6 m EUR í lok mars 2026. Þar af voru fastafjármunir 771,7 m EUR og veltufjármunir 194,9 m EUR. Í lok árs 2025 námu heildareignir 945,4 m EUR og þar af voru fastafjármunir 769,3 m EUR og veltufjármunir 176,1 m EUR. Veltufjármunir jukust um 18,8 m EUR milli tímabila.

Fjárhagsstaða félagsins er áfram sterk og nam eigið fé 641,3 m EUR. Eiginfjárhlutfall var 66,3% í lok tímabilsins en það var 66,1% í lok árs 2025.

Heildarskuldir og -skuldbindingar félagsins voru 325,3 m EUR í lok tímabilsins og hækkuðu um 4,9 m EUR frá áramótum. Vaxtaberandi skuldir voru 177,2 m EUR í lok tímabilsins og hafa lækkað um 17,3 m EUR frá áramótum.

Sjóðstreymi 

Handbært fé frá rekstri nam 24,8 m EUR á fyrsta ársfjórðungi 2026 en var 24,3 m EUR á sama tímabili 2025. Fjárfestingahreyfingar voru neikvæðar um 1,0 m EUR og fjármögnunarhreyfingar neikvæðar um 40,3 m EUR. Handbært fé í lok tímabilsins nam 66,5 m EUR.

Meginniðurstöður í íslenskum krónum á fyrsta ársfjórðungi 2026

Séu niðurstöður rekstrarreiknings tímabilsins reiknaðar í íslenskar krónur á meðalgengi þess (1 EUR=145,03 kr.) voru rekstrartekjur 16,5 milljarðar króna. EBITDA nam 6,7 milljörðum króna og hagnaður tímabilsins var 5,1 milljarður króna. Séu niðurstöður efnahagsreiknings reiknaðar í íslenskar krónur á gengi 31. mars 2026 (1 EUR=143,6 kr.) voru eignir samtals 138,8 milljarðar króna, skuldir 46,7 milljarðar króna og eigið fé 92,1 milljarðar króna.

Samþykkt árshlutareiknings 

Árshlutauppgjör fyrir fyrsta ársfjórðung 2026 var samþykkt á stjórnarfundi Síldarvinnslunnar þann 21. maí 2026. Árshlutareikningurinn er í samræmi við alþjóðlega reikningsskilastaðla (IFRS - International Financial Reporting Standards). 

Kynningarfundur 21. maí 2026

Rafrænn kynningarfundur fyrir markaðsaðila og fjárfesta verður haldinn á vefstreymi fimmtudaginn 21. maí  klukkan 16:30. Streymið verður aðgengilegt á vefsíðu Síldarvinnslunnar https://svn.is/fjarfestar/streymi/. Streymið verður einnig aðgengilegt á streymisrás Síldarvinnslunnar á YouTube. https://www.youtube.com/channel/UC-7V1TcKj92J5Mc9OMMcFZQ/videos Þá verður hægt að senda spurningar á netfangið fjarfestir@svn.is og reynt verður að svara þeim á kynningarfundinum eftir fremsta megni. 

Frá forstjóra 

Árið fer vel af stað og rekstur félagsins hefur almennt gengið vel á tímabilinu. Veiðar og vinnsla uppsjávarfisks og bolfisks hafa gengið vel og afurðaverð í bolfiski hefur verið hátt. Reksturinn á fjórðungnum ber þess merki að ytri skilyrði greinarinnar eru hagfelld. Eftirspurn eftir sjávarafurðum er mikil og verð hafa hækkað.

Loðnuvertíðin gekk vel þó enn eigi eftir að selja töluvert af loðnuafurðum vertíðarinnar og mun þróun afurðaverðs á næstu mánuðum því hafa áhrif á endanlega afkomu vertíðarinnar. Kolmunnaveiðar í janúar gengu vel. Á sama tíma eru ákveðnar blikur á lofti vegna heimilda til veiða í færeyskri lögsögu í haust enda rennur út samningur Íslands við Færeyjar þar að lútandi í ágúst. Óvissa um aðgengi að þeim veiðisvæðum getur haft áhrif á skipulag veiða síðar á árinu.

Stutt er í að Hafró kynni ráðgjöf fyrir helstu nytjastofna. Niðurstöður úr vorralli gefa þó ekki tilefni til bjartsýni og líklegast er að ráðgjöf í þorski haldi áfram að dragast saman á næsta ári.

Á tímabilinu var Birtingur tekinn í rekstur og Gullveri og Jóhönnu lagt á móti. Búið er að ganga frá sölu á Gullveri. Þessar breytingar eru liður í áframhaldandi endurnýjun og hagræðingu í rekstri félagsins, þar sem lögð er áhersla á betri nýtingu fjármuna, aukna skilvirkni og sterka langtímastöðu flotans.

Á tímabilinu var hafist handa við undirbúning og framkvæmd frekari fjárfestinga í innviðum félagsins. Áfram er lögð áhersla á fjárfestingar og þróun á orkusparandi lausnum í vinnslu, bæði til að draga úr kostnaði og styrkja samkeppnishæfni félagsins til lengri tíma. Stækkun og endurnýjun á skrifstofuhúsnæðis í Neskaupstað er hafin.

Síldarvinnslan hf. birtir nú fyrsta uppgjör sitt eftir breytingu á starfrækslugjaldmiðli félagsins. Breytingin endurspeglar breytt eðli rekstursins, tekjustreymi og fjárhagslegt umhverfi félagsins, þar sem stór hluti tekna og kostnaðar tengist erlendum mörkuðum og viðskiptum í erlendum gjaldmiðlum, þar vegur evran þyngst. Samanburðartölur frá fyrra ári hafa verið endurreiknaðar í evrur í samræmi við reikningsskila staðla.

Álögur á sjávarútveg hafa aukist umtalsvert undanfarin misseri og eru horfur í orkumálum óljósar. Olíuverð hefur hækkað mjög mikið vegna átaka í mið Austurlöndum og blikur eru á lofti með raforkuverð. Segja má að svikalogn hafi ríkt vegna minni umsvifa Norðuráls í kjölfar óhapps. Mikil pressa er á eftirspurnarhliðinni sem dregur úr jákvæðum áhrifum betri stöðu uppistöðulóna. Félagið mun áfram fylgjast náið með þróun orkuverðs, enda hefur það bein áhrif á vinnslu, fjárfestingarákvarðanir og rekstrarumhverfi íslenskra sjávarútvegsfyrirtækja.

Rekstrarumhverfi fiskeldis er áfram þungt og sést það m.a. á uppgjöri hlutdeildarfélagsins Arctic Fish vegna fyrsta ársfjórðungs. Fyrirhuguð gjaldtaka veldur áhyggjum, einkum í ljósi þess að hluthafar stærstu fiskeldisfyrirtækjanna hafa þegar lagt þeim til aukið rekstrarfé á síðasta ári og ekki sjálfgefið að slíkur stuðningur haldi áfram við óbreyttar aðstæður. Helstu þættir sem gera rekstrarskilyrði fiskeldisins erfið eru að verulegu leyti á áhrifasviði stjórnvalda, einkum gjöld, innlendur kostnaður og sterk íslensk króna. Þessir þættir hafa þrengt verulega að greininni og mikilvægt er að stjórnvöld horfi til þess að fiskeldi er enn ung atvinnugrein sem þarf fyrirsjáanlegt og samkeppnishæft rekstrarumhverfi til að geta vaxið og skapað verðmæti til framtíðar.

Nú erum við að skila góðum ársfjórðung, þar sem kemur saman samspil góðrar loðnuvertíðar og há fiskverð. Við megum ekki gleyma því að á sama tíma hafa verið töluverðar kostnaðarhækkanir hér heima, álögur á greinina hafa hækkað, vextir hafa hækkað og óvissuástand viðvarandi víða á okkar helstu mörkuðum. Íslenskur sjávarútvegur þarf stöðugt að vera á tánum til að gæta að samkeppnishæfni sinni til framtíðar.

 Fjárhagsdagatal 
1. ársfjórðungur 2026 – 21. maí 2026 

2. ársfjórðungur 2026 – 27. ágúst 2026   

3. ársfjórðungur 2026 – 19. nóvember 2026 

Ársuppgjör 2026 – 4. mars 2027   

Nánari upplýsingar 

Gunnþór B. Ingvason, forstjóri