26. október 2023 – Fréttatilkynning

2.304 m.kr. hagnaður og samsett hlutfall 95,9% á fyrstu níu mánuðum ársins

Þriðji ársfjórðungur 2023

• Hagnaður af vátryggingasamningum fyrir skatta 578 m.kr. (3F 2022: 347 m.kr.)
• Hagnaður af fjárfestingarstarfsemi fyrir skatta 1.318 m.kr. (Tap 3F 2022: 84 m.kr.)
• Hagnaður tímabilsins 1.738 m.kr. (3F 2022: 231 m.kr.)
• Ávöxtun fjárfestingareigna í stýringu 3,0% (3F 2022: 0,1%)
• Samsett hlutfall 92,9% (3F 2022: 95,3%)

Fyrstu níu mánuðir ársins 2023 og horfur

• Hagnaður af vátryggingasamningum fyrir skatta 946 m.kr. (9M 2022: 799 m.kr.)
• Hagnaður af fjárfestingarstarfsemi fyrir skatta 1.715 m.kr. (9M 2022: 535 m.kr.)
• Hagnaður tímabilsins 2.304 m.kr. (9M 2022: 1.167 m.kr.)
• Ávöxtun fjárfestingareigna í stýringu 4,4% (9M 2022: 1,4%)
• Samsett hlutfall 95,9% (9M 2022: 96,1%)
• Horfur fyrir árið 2023 gera ráð fyrir að afkoma af vátryggingasamningum verði um 1.000-1.300 m.kr. og samsett hlutfall 96-97%
• Horfur til næstu 12 mánaða gera ráð fyrir að afkoma af vátryggingasamningum verði um 1.100-1.600 m.kr. og samsett hlutfall 95-97%

Hermann Björnsson, forstjóri:
Hagnaður Sjóvár á þriðja ársfjórðungi nam 1.738 m.kr. og var samsett hlutfall 92,9%. Grunnrekstur félagsins skilar virkilega sterkri niðurstöðu í krefjandi umhverfi en hagnaður af vátryggingasamningum fyrir skatta á fjórðungnum nam 578 m.kr. Tekjur af vátryggingasamningum jukust um 9,5% miðað við sama fjórðung í fyrra og var vöxturinn bæði á fyrirtækja – og einstaklingsmarkaði. Góður vöxtur skýrist af miklum metnaði í þjónustu, þéttriðnu útibúaneti ásamt góðum stafrænum lausnum sem efla okkar þjónustustig enn frekar. Þegar talað er um krefjandi umhverfi þá má benda á fjölgun brunatjóna undanfarin misseri sem er áhyggjuefni og kallar á enn frekari greiningu tilvika og eftir atvikum skýrari aðgerðir til forvarna.

Afkoma af fjárfestingastarfsemi fyrir fjármagnsliði og skatta nam 1.504 m. kr. á þriðja ársfjórðungi og skýrist að mestu leyti af söluhagnaði af eignarhlut Sjóvár í Kerecis sem nam 1.260 m.kr. Markaðir hafa verið erfiðir það sem af er ári og var ekki lát á því á fjórðungnum, þar sem bæði hlutabréf og skuldabréf lækkuðu almennt í verði. Ávöxtun fjárfestingaeigna nam 3,0% á fjórðungnum og skiluðu allir eignaflokkar, að undanskildum skráðum hlutabréfum, jákvæðri afkomu. Ávöxtun skuldabréfa með ríkisábyrgð var 0,6%, annarra skuldabréfa 1,2% en skráðra hlutabréfa -1,3% á fjórðungnum.

Hagnaður Sjóvár á fyrstu níu mánuðum ársins nam 2.304 m.kr. og var samsett hlutfall 95,9%. Þar af nam hagnaður af vátryggingasamningum fyrir skatta 946 m.kr. og jókst um 18,5% á milli ára. Hagnaður af fjárfestingastarfsemi fyrir fjármagnsliði og skatta nam 2.131 m.kr. á fyrstu níu mánuðum ársins.

Nýtt björgunarskip Landsbjargar, Jóhannes Briem, var afhent í mánuðinum við hátíðlega athöfn í Reykjavík. Sjóvá styrkti Landsbjörg um 142,5 milljónir til kaupa á þremur skipum sem hafa nú öll verið tekin í notkun. Það er okkur mikil ánægja að styðja við þetta brýna verkefni sem tryggir stóraukið öryggi, bæði á sjó og landi.

Horfur okkar fyrir afkomu þessa árs og til næstu 12 mánaða eru óbreyttar, þ.e. að samsett hlutfall ársins 2023 verði 96-97% og afkoma af vátryggingasamningum verði 1.000 – 1.300 m.kr. Horfur til næstu 12 mánaða gera ráð fyrir að samsett hlutfall verði 95-97% og afkoma af vátryggingasamningum verði 1.100 – 1.600 m.kr.

Kynningarfundur 26. október kl. 16:15

Markaðsaðilum og fjárfestum er boðið á kynningarfund í fundarsal félagsins í Kringlunni 5, 6. hæð þann 26. október kl. 16:15. Þar munu Hermann Björnsson forstjóri, Sigríður Vala Halldórsdóttir framkvæmdastjóri fjármála og upplýsingatækni og Þórður Pálsson forstöðumaður fjárfestinga kynna uppgjörið og fara yfir afkomu félagsins. Kynningunni verður jafnframt streymt á slóðinni https://www.sjova.is/um-okkur/fjarfestar/afkomukynning-3f-2023/.

Vilji aðilar bera upp spurningar má senda þær á netfangið fjarfestar@sjova.is fyrir fundinn eða á meðan á fundi stendur og verður þeim svarað í lok kynningarinnar.

Uppgjörsefni verður aðgengilegt á vef Sjóvár www.sjova.is/fjarfestar frá þeim tíma er kynningin hefst og verður upptaka af fundinum aðgengileg á sömu síðu að fundi loknum.

Fjárhagsdagatal

Ársuppgjör 2023                       8. febrúar 2024
Aðalfundur 2024                       7. mars 2024

Nánari upplýsingar
Meðfylgjandi er fréttatilkynning, samandreginn árshlutareikningur samstæðunnar og fjárfestakynning Sjóvá-Almennra trygginga hf. vegna þriðja ársfjórðungs 2023.

Nánari upplýsingar veitir Davíð Scheving Thorsteinsson í síma 869-8109 eða fjarfestar@sjova.is.