Í tengslum við yfirfærslu vátryggingastofns og vátryggingareksturs frá Skaga hf. (áður Vátryggingafélag Íslands) til dótturfélagsins VÍS trygginga hf., hafa VÍS tryggingar hf. gefið út víkjandi skuldabréf, að höfuðstólsfjárhæð kr. 2.500.000.000 (uppreiknað m.v. 31.12.2024 kr. 3.766.931.189), dags. 1. janúar 2025, sem speglar skilmála skuldabréfaflokksins SKAGI 16 1 (áður VIS 16 1) að öllu verulegu leyti. 

Skagi hf., hefur nú veðsett skuldabréfaeigendum skv. skuldabréfaflokknum SKAGI 16 1 allar almennar fjárkröfur Skaga hf. á hendur VÍS tryggingum hf. á grundvelli víkjandi skuldabréfsins til tryggingar fjárskuldbindingum Skaga hf. skv. skuldabréfaflokki SKAGI 16 1.

Samhliða þessu hefur Skagi hf. gert veðgæslusamning við BBA Fjeldco ehf., sem hefur tekið að sér hlutverk veðgæsluaðila í þágu skuldabréfaeigenda. Um breytingar á veðgæslusamningnum og veðskjalinu gilda skilmálar skuldabréfaflokksins, þ.e. breytingar eru háðar samþykki útgefanda, fjármálaeftirlits Seðlabanka Íslands og 2/3 skuldabréfa­eigenda (að fjárhæð en ekki höfðatölu) á fundi skuldabréfa­eigenda.

Yfirlýsing um veð í almennum fjárkröfum og veðgæslusamningurinn eru meðfylgjandi tilkynningu þessari og verða jafnframt aðgengileg á vefsvæði Skaga https://skagi.is/starfsreglur-og-stjornarhaettir

Nánari upplýsingar veitir forstjóri félagsins, Haraldur I. Þórðarson með tölvupósti á haraldur@skagi.is