Sýn hf.: Vegna málshöfðunar Gavia Invest ehf. gegn Heiðari Guðjónssyni og Úrsus ehf.
Í tilefni af því að fjölmiðlar hafa fjallað um málshöfðun Gavia Invest ehf á hendur Heiðari Guðjónssyn og Úrsus ehf, félagi í eigu fyrrum forstjóra Sýnar, vegna viðskipta með hlutabréf í Sýn á árinu 2022, skal eftirfarandi tekið fram:
Málshöfðunin beinist ekki að Sýn hf., en þrátt fyrir að vera ekki aðili að fyrrgreindu máli, telur Sýn rétt af þessu tilefni að upplýsa um að félagið hafði að eigin frumkvæði, í febrúar á þessu ári, upplýst Fjármálaeftirlit Seðlabanka Íslands um atvik sem varða meðferð upplýsinga innan félagsins á vormánuðum og sumarið árið 2022.
Við yfirferð stjórnar og stjórnenda á eldri rekstrargögnum í tengslum við áætlanagerð fyrir árið 2026 komu fram upplýsingar sem leiddu til frekari skoðunar á því hvort meðferð upplýsinga um uppfærða innri rekstrarspá félagsins á árinu 2022 hefði verið í samræmi við gildandi reglur. Í kjölfar þeirrar yfirferðar óskaði stjórn félagsins eftir óháðu lögfræðiáliti og ákvað í framhaldi af því að upplýsa Fjármálaeftirlitið um málið og afhenda því viðeigandi gögn. Stjórnarmenn sem töldust hagsmunatengdir málinu sögðu sig frá málinu á vettvangi stjórnar og við tók stjórn óháðra stjórnarmanna var falið að vinna málið áfram sem til að gæta fyllsta hlutleysis.
Málið lýtur meðal annars að því að uppfærð innri rekstrarspá vegna þróunar IoT-tekna virðist ekki hafa verið miðlað innan félagsins í samræmi við verkferla. Um svipað leyti áttu sér stað hlutabréfaviðskipti af hálfu félags í eigu þáverandi forstjóra félagsins. Sýn tekur ekki afstöðu til þess hvort um brot á lögum eða reglum hafi verið að ræða og hefur ekki fengið neina afstöðu Fjármálaeftirlitsins þar að lútandi.
Stjórn Sýnar hf. tekur fram að afkoma og rekstur félagsins í dag er í samræmi við birtar áætlanir og að þau sögulegu atvik sem hér um ræðir hafa ekki áhrif á núverandi daglegan rekstur.
Félagið telur ekki rétt að tjá sig frekar um málið á þessu stigi en mun upplýsa um framvindu málsins eftir því sem tilefni kann að gefast til.