Stjórnir Skaga – Vátryggingafélags Íslands hf. („Skagi“), Fossa fjárfestingarbanka hf. („Fossar“), SIV eignastýringar hf. („SIV“), Íslenskra verðbréfa hf. („ÍV) og ÍV sjóða hf. (ÍVS) hafa fjallað um og samþykkt tilhögun á fyrirhugaðri samþættingu ÍV og ÍVS inn í samstæðu Skaga. Annars vegar er fyrirhugað að samþætta starfsemi ÍV við starfsemi Fossa með þeim hætti að ÍV verður skipt upp og hluti þess sameinaður Fossum. Hins vegar er fyrirhugað að sameina ÍVS og SIV þar sem ÍVS er yfirtökufélag, en sameinað félag mun starfa undir heitinu Íslensk verðbréf. Í báðum tilvikum munu skiptin og samrunar miðast við 1.1.2025 en fyrirvari er um samþykki fjármálaeftirlits Seðlabanka Íslands og staðfestingu fyrirtækjaskrár Skattsins.

Samhliða hefur verið gengið frá samkomulagi um kauprétt Skaga – Vátryggingafélags Íslands hf. („Skagi“ eða “félagið”) á alls 14,40% hlut í sameinuðu félagi SIV og ÍVS af minnihlutaeigendum sameinaðs félags. Kaupréttarsamkomulagið gerir ráð fyrir mögulegri nýtingu kaupréttar í upphafi ársins 2026. Verði kauprétturinn nýttur að hálfu Skaga, er gert ráð fyrir að seljendur hlutanna („seljendur“) fái kaupverðið greitt með hlutabréfum í Skaga. Jafnframt er skilyrði um sölubann seljenda á hlutabréfum sem þeir fá afhend í Skaga og að sölubann gildi til tveggja ára. Samkomulagið er gert með fyrirvara um samþykki hluthafa fyrir útgáfu nýs hlutafjár í Skaga til að mæta kaupverðinu.

Með sameiningu SIV eignastýringar og ÍV sjóða undir heitinu Íslensk verðbréf verður til öflugt eigna- og sjóðastýringarfélag með hátt í 200 milljarða króna í stýringu. Arnór Gunnarsson verður framkvæmdastjóri Íslenskra verðbréfa og Jón Helgi Pétursson rekstrarstjóri. Sameinað félag mun byggja á öflugu teymi sjóðstjóra frá SIV og ÍV sjóðum með áratuga reynslu í fjárfestingum, en starfsemi félagsins skiptist í eigna- og sjóðastýringu. Fjárfestingasafn VÍS trygginga verður sem fyrr í stýringu hjá eignastýringarsviði félagsins sem Arnór mun veita forstöðu en auk þess eru sérgreind söfn fyrir fagfjárfesta og stofnanafjárfesta í stýringu félagsins. Þorkell Magnússon mun veita sjóðastýringu forstöðu en félagið mun bjóða upp á fjölbreytta valkosti opinna og lokaðra sjóða fyrir almenna fjárfesta jafnt og fagfjárfesta. Íslensk verðbréf stefnir á frekari vöxt á innlendum eignastýringarmarkaði með hagsmuni viðskiptavina og langtímaárangur þeirra að leiðarljósi.

Frekari upplýsingar veitir:

Haraldur I. Þórðarson, forstjóri Skaga, með tölvupósti á netfangið haraldur@skagi.is